Senin, 11 Oktober 2010

Cengah

"Euuy Es!! banguuun matoari la mencelek nah!!", Emon langsung be nangike makhluk-makhluk penghuni BEM yang masih muto galo. Dibukaknyo beber supayo sinar matoari biso masok ke ruangan BEM yang cuma sepetak itu tapi pengepnyo mintak ampun. Taulah dewek, penghuninyo lanang galo.

"Euuy Mon, gek dukin!! kamek ni baru be muto!", uji Rendra sambil tekeliep matonyo keno sinar matoari. "Aiii... katek-katek!!! tangilah galo.. men dak tuh, ku ambek'i banyu tuk nyiram kamok ni galo!!", Kato emon sambil ambek sapu. Rendra, Ucok dan Husni cuman biso tangi tapi dak rela, galo-galonyo teduduk di korsi meja rapat, telentok sambil naekke kaki, takut disapu Doraemon yang dak tau makan apo pagi nih pacak tibo-tibo rajin.

Ilham cuman diem jingok gawe kawan-kawannyo, matonyo ngawasi galo-galo sudut ruangan, dari cicek yang belago di plapon sampe ke rai kawan-kawannyo yang telentok di meja rapat. "Nuh,, gapo rai kau Cok?", tanyo Ilham waktu jingok rai Ucok yang pake handyplast di tempel malang-melintang. "Biasolah lur, kemaren kito aksi di kantor Gubernur, kami telepon hape kau idak aktif", uji ucok sambil megang-megang jidatnyo yang cengah.

Memang, kawan-kawan sekarang nih lagi rame-ramenyo ngadoke aksi menentang pengalihan lahan hijau dan rawa di Pelembang untuk dibangun jadi pusat belenan. Mereka nih khawatir kalo wong Pelembang bakalan kekurangan Oksigen (O2) gara-garanyo. Masok akal pulok, cubo peratike sekarang nih Pelembang panas tejengkang. "Euuy Ham!!!", neeeh... melamun lagi!! kemasuk'an kuntilanak nian kau nih gek", Emon la sampe pulok ke deket Ilham, sapunyo lah nari-nari di kaki Ilham, ilham cuman pacak mengger teratur.

Rendra la bangun dari tempat duduknyo, lagi manasi banyu dispenser tuk buat kopi. "laju, apo pasal kau pacak cengah nih?", Ilham penasaran. "Kemaren tuh keadaan panas lur, ampir be kito bentrok. Tapi Pol PP banyak nian", sampe ngadang mundur kito", Rendra cubo jelasin. "truss....???", Ilham tambah penasaran. Dio meraso aneh, kalo memang kemaren ado bentrok pastilah ado beritanyo di koran pagi ini, tapi caknyo koran adem ayem be.

"Aii... payah dulur kito sikok nih, malu-maluin kito be. Waktu kito dan yang aksi laennyo sepakat mundur teratur kareno memang rencana aksi kito cuman nak nyampe ke aspirasi, budak nih malah nyungsep ke got yang ado di depan kantor Gubernur", Uji Rendra sambel ketawo-tawo, Kopi yang lagi dikudeknyo sampe tumpah-tumpah saking ladasnyo dio ketawo. Galo-galo di ruangan itu jadi ladas melok ketawo, cuman Ucok yang mesem-mesem dak kelemak'an.


Sabtu, 09 Oktober 2010

Masok Kuliah Lagi

" Kak Ilham!!! Gancanglah dikit!!! telat pulok aku nih!!" , suaro Nurul yang cempreng cak kuali emek yang digebuki pake sok besi buat Ilham yang tadi tegak cak patung di depan kaco mengagumi kebelagak'annyo tekejut, "Aii.. dulur aku sikok-sikoknyo nih dak tau nian apo amon kakaknyo nih mesti jago nian penampilan di hari petamo masok kuliah sesudah prei panjang semester sudah tuh mubuh pulok prei lebaran", kato ilham dalem ati, sambil metu ke ruang makan untuk makan pagi besamo abah, emek, Yai dan pastinyo si Nurul adeknyo sikok-sikoknyo yang dak tek duonyo sepelembang anget ini.

"Payo gancang kak, makanan kakak lah aku bungkusi, masok'i be ke tas, makan di kampus be! aku piket hari nih kak... mati nian aku mon telat!!!", uji Nurul sambel begancang masuke bungkusan roti yang sudah diolesi sele kacang ke tas Ilham. Ilham cuman biso melongok-longok waktu tangannyo ditarek Nurul langsung ke motor bebeknyo, diiringi pandangan mato emek, abah dan yai yang mesem-mesem. "Assalamualaikum, kami pegi dulu meek!!!" uji Nurul langsung melompat ke jok belakang, "Peh, gancang kak!!", uji Nurul dan Ilham pun cak keno hipnotis melok'i kendak Nurul supayo jalani motornyo.

Ilham jingok jam waktu sudah parkerke motornyo di halaman Fakultas Teknik kampus di Jalan A Yani Plaju. "Aii.. kepagian aku nih!!! Apo kato dunia... The Crew Bedalu, kepagian di kampus", Ilham ngedumel dewek'an sambil rai nyo mengot-mengot cak bentuk jajaran genjang dak sejajar. Ilham langsung bejalan ke bucu bangunan Fakultas Teknik yang bentuknyo segi empat, "sarapan dukin aii", uji Ilham sambel ngeluarke bungkusan roti yang bentuknyo jugo la penyot-penyot ketendeh Buku Operasi Teknik Kimia yang dipinjemnyo di perpustakaan Fakultas sebelum prei dulu.

"Euuy Lur!!!! Po gawe pagi-pagi la datang neh? ado jam pagi yo?". Ilham tekejut denger ado suaro katek wongnyo. "mati aku, pagi-pagi la ditegur antu", ujinyo dalem ati sampe dak teraso roti potongan terakher ditelen bae dak pake dikunyah lagi. Matonyo muter-muter cari sumber bunyi dak tek frekuensi itu. "Wadoooowwww!!!!", Ilham tejeret waktu sekelnyo tibo-tibo teraso saket cak dipijak gajah. Ilham langsung jingok ke bawah, "Yakwaaa!!! Po dio kau nih Mon??? Sakeeet sekel aku nih!!!! Ilham langsung marah-marah sambel badannyo melenting-lenting cak ulet nangko nahan kakinyo yang saket. "Kau tuh pulok, nak buat marah ado... ditegur dak nyaut!!", uji Emon sambel rainyo jugo mencong-mencong nahan kesel.

Ilham narek nafas lego, jingok kawannyo sefakultas tapi dak sejurusan itu. Memang, kawannyo sikok ini agak beda dikit dari kawan-kawannyo yang laen, men yang laen tuh pertumbuhan tubuhnyo ke pucuk, nah men si Emon ini pertumbuhannyo ke sampeng, alias melebar, alias lagi horizontal. Ilham teringet waktu dulu petamo daftar kuliah, dio tes kesehatan barengan dengan makhluk yang namonyo Emon ini. Dokter yang ngetes kesehatan pacaknyo geleng-geleng kepalak, waktu di ukur tinggi badan Emon yang cuma 110 cm tapi berat badannyo nyampe 69 kg.

"Neh!! malah diem dio!!! kemasuk'an kuntilanak gek kau ni!!", emon tambah kesel be jingok Ilham yang manyun dengan mulut tenganga. Ilham bangun dari alam bawah sadarnyo, waktu jingok kawannyo sikok nih la mulai ngelepet-lepet rainyo. "Dak do lur, tadi aku nganteri si Nurul, katonyo hari ni piket", ilham ngenjuk penjelasan sejelas-jelasnyo supayo rai Emon yang la jahat dak lagi telepet. Dasar Si Emon doraemon!! taunyo dio dak ngibak'i sedikit be penjelasan Ilham, badannyo yang la cak buah nangko dibungkus karung melaju be ke ruang sekretariat BEM, dengan males-malesan Ilham melok'i jugo langkah Si Emon.