Minggu, 10 April 2011

Dosen Paleng Killer

"Hoaaaeemm!!! mati aku Ham, ngapo ngantuk nian mato ni!!", Uji Soleh yang duduk di sebelah korsi Ilham. Ilham cak-cak dak tau be, matonyo tetap awas ke pelajaran yang disampe ke Pak Husni di depan kelas. "Oii.. Ham..!! aii.. payah kau ni, dak ngibak'i aku", uji Soleh lagi. Ilham maseh dak berenggut jugo, tapi dalem ati nyo la nak marah-marah dengan kawannyo sikok nih.. "Apo dio nih dak ngerti, Pak Husni nih dosen paleng killer, sekali be kito buat marah dio, pacak-pacak nilai nih dak lebeh dari nilai D", Rai Ilham merengut cak kambeng nak disembeleh.

Untunglah, Soleh dak ngucak'i Ilham lagi. Suasana kelas sepi nian cak kuburan, dak tek yang berani besuaro sedikit be, padahal la dak jadi rahasio lagi Kelas A ini sebenernyo budak-budaknyo nyenyes galo, tapi men pelajaran Pak Husni dak katek yang pacak bekutik.

"Payo... sekarang siapo yang pacak nyudahi soal ini?", uji pak Husni sambil nunjuk-nunjuk soal yang ditolesnyo di papan tulis pake pena sinar laser. Galo-galo yang di dalem kelas tediem cak si bisu dari goa antu, makmano dak tediem, pelajaran Pak Husni yang tigo SKS ini dari petamo jam masuk sampe la nak terakher cak ini yang di ajari nyo dak tek nian yang masuk di otak!!

"Aii.. kalo katek yang nunjuk tangan, bapak peleh di absen be", uji pak Husni sambil meleh-meleh namo siswa yang ado di kartu absen warno abang mudo. "Nah.. nah.. mati nian!! uji Ilham dalem ati dan cuma nunduk ke kepalak dak berani jingok depan.

Sekali nih, suasana kelas bukan lagi cak kuburan, tapi la cak ruang angkasa dak tek hawo. Galo-galo budak caknyo lagi nahan nafas galo saking takutnyo ditunjuk, dan bedasarkan uji telepati raso Ilham, pastilah sekarang nih budak-budak lagi bedoa dalem ati galo...

"Soleh Mahmud!", Bunyi suaro Pak Husni la cak kapten kapal saking besaknyo. Hah... uji Ilham lego kareno bukan namonyo yang disebut. "Mano Soleh Mahmud", uji Pak Husni nyari-nyari budak yang benamo Soleh Mahmud.

Galo-galo mato langsung nyingok ke arah Soleh yang duduk di bucu ruang sebelah Ilham. "Yakwaaaa... budak sikok nih..!! malah molor!!", uji Ilham tekejut setengah edup jingok si Soleh yang palaknyo telentok di meja. Buku catetannyo jugo lah basah galo keno banjir iler. "Oii.. leeh.. tangiii...!!!!", uji ilham sambel julak-julakke badan si Soleh. Tapi memang dasar si Soleh kalo teduk la cak Kebo, malah suaro ngoroknyo tambah besak.

Galo-galo rai yang ado di kelas la pucat cak kapuk jingok gawe si Soleh, dah tuk segalo rai jugo serempak jingok ke arah Pak Husni yang bejalan ke arah Soleh. "Naah!! mati nian kau Leh", uji galo-galo budak dalem ati.

Ilham lah dak tau lagi cakmano caro nangi ke Kebo di sebelahnyo, sampe akhernyo Pak Husni la tegak di Depan Soleh sambel megang buku Diktat yang tebel, saking tebelnyo buku diktat tuh.. men dibabetke ke kucing pacak kucing tuh jadi pingsan.

"Soleh Mahmud", Panggel Pak Husni yang suaronyo la cak geledek. Cacam nian, si Soleh bukannyo tangi, malah tambah ngorok dan tambah mbesakke gambar peta iler nyo. "Soleh Mahmud!!", sekali nih suaro pak Husni lebih besak lagi, saking besaknyo.. Ilham yang duduk di sebelah Soleh harus notop kopeng men dak galak gendang kopengnyo pecah.

"soleh.. tangiiii!!!", sekali nih Ilham nyulak-nyulak ke badan si Soleh. Saking kuatnyo julak'an Ilham, amper be badan soleh campak dari korsi. "Aaai.. Ham... !!! jangan ganggu aku... aku lagi mimpi ketemu bidadari nah...", uji Soleh cak ngigau. "Oiii.. Leh... ado Pak Husni...", uji Ilham tetap nyulak-nyulakke badan Soleh. "Jangan nak ngotak'i aku lur... aku tau kau tuh pengen jugo ketemu bidadari,,, gek lah aku sampe ke salam ye..." uji soleh mbaseng.

"Prraaaaak!!!!!!!", Buku Diktat tebel Pak Husni nyentak di pucuk meja Soleh. "OOOiiii..... sapo nian yang berani samo aku nih???", uji Soleh telunjak langsung tegak. "Aku!!", uji pak Husni yang rainyo la abang cak udang goreng sakeng marah.

Soleh ngucek-ngucek mato, dak pecayo tibo-tibo bidadari yang ado di depannyo berubah wujud jadi Pak Husni. "Pak Husni...??", tanyo Soleh cak wong buyan sakeng tekejutnyo. "Iyo aku!!", uji pak Husni sambil jelit-jelit ke matonyo yang amper nak metu.

Rai Soleh berubah pucat cak abes jingok antu. "Hebat nian ye.. kau teduk di kelas,, lah pinter nian caknyo??", uji Pak Husni yang di jawab geleng palak oleh Soleh. "Nah.. men kau pinter nian, kau gaweke soal yang di depan kelas tuh, toles di kertas rangkap seratus!! Aku tunggu hari ni lah sudahnyo,, men besok... rangkapnyo ditambah seratus lagi!! Nah.. men salah jawabannyo., nolesnyo harus di dobel ke lagi!! ngerti dak??", tanyo Pak Husni. Soleh tediem dan cuma pacak manggut-manggut.

"Baiklah, Oleh kareno alarm la bunyi, sampe sini be pelajaran kito sari ni, Assalamualaikum", uji Pak Husni sambil menuju ke mejanyo untuk beringkesi buku-buku.